巴西球星尼馬，自從由巴塞隆拿轉會巴黎聖日耳門後，有傳一直都未能適應，並為離開巴塞而感到後悔，甚至曾5次打回給巴塞表達自己想重返球隊。

消息指，尼馬對於當天離開巴塞嘅決定非常後悔，佢想收回自己呢個決定，而其父親亦為左兒子向巴塞主席Josep Maria Bartomeu作出請求，希望對方能夠將尼馬帶回魯營。

尼馬父親向巴塞主席表示，尼馬對於自己嘅情況感到非常失望及抱歉。

當日離隊，有唔少報導都指尼馬係唔想活喺美斯嘅陰影下，想自立門戶。誰不知去到巴黎，佢嘅年輕隊友麥巴比卻突飛猛進，唔只表現越黎越好，更隨法國隊奪得世界盃冠軍，成為球壇當紅炸子雞。有見及此，尼馬應該感覺到自己隊內嘅地位會被對方進一步侵蝕，因此有感不安。

2017年夏天，尼馬以2.22億歐元破世界紀錄嘅轉會費由巴塞加盟巴黎聖日耳門，至今一共為球隊上陣51場攻入46球，效率非常不錯。不過，有傳尼馬覺得法甲聯賽總體競爭力不足，令佢覺得無挑戰性，但歐聯賽事球隊又走得唔遠，可能因此令尼馬想再次轉換環境。

不過，如今嘅巴塞其實並不一定需要尼馬，因為美斯及蘇亞雷斯今季表現繼續出色，而頂替尼馬位置嘅迪比利亦打出身價，多次拯救巴塞，連古天奴亦未能動搖其正選位置，可見尼馬回歸巴塞嘅機會實在不大。