又一個冠軍啦！尋晚意大利超級盃，祖雲達斯以1:0小勝AC米蘭，奪得今季首個冠軍，係球隊隊史第8個超級盃冠軍，排名意大利球隊第1位。

而為祖記今場帶黎唯一一個入球嘅係邊個？答案咪就係今季先加盟嘅C朗拿度囉！一次招牌式加速突入，隊友一個精彩過頭長傳，C朗跳起一頂，就係咁收死左米蘭門將當拿隆馬，而祖記亦都係憑住呢個入球，成功擊敗AC米蘭。

今次奪得超級盃冠軍，除左係祖記隊史嘅第8個超級盃冠軍外，亦係C朗加盟祖記後第一個冠軍，而C朗亦都證明自己係冠軍獎盃收割機，因為佢生涯入面曾29次參加賽事決賽，其中22次成功奪得冠軍，勝率高達75.9%，亦即係話決賽中有C朗拿度嘅話要奪冠機會大得多。

33歲嘅C朗拿度雖然離開左連奪三屆歐聯冠軍嘅皇馬，但係加盟祖記後佢證明自己係佢令皇馬咁強大的，睇下而家皇馬嘅表現就可知一二，而祖記獲得佢就代表喺關鍵嘅比賽入面有一位足以改寫戰局嘅超級球員！

C朗今季喺各項賽事入面已經上陣左26場攻入16球，並交出7次助攻，亦即係佢一人已經為祖記產生23個入球，實在好難會有人同意佢已經走下坡，究竟呢位怪物幾時先會從巔峰走落黎呢？