日本富士電視台2018年春季4月嘅月九劇《信用欺詐師JP》，由長澤正美、東出昌大及小日向文世主演。故事主要講述三名信用欺詐師憑住各自嘅頭腦，用各種異想天開嘅計劃從利慾薰心嘅惡人們手中騙取錢財嘅單元劇故事。

而呢套日劇原來係長澤正美睽違11年以嚟，第二度接演富士電視台嘅月9檔連續劇，佢對上一次嘅作品已經係2007年嘅神劇《求婚大作戰》！呢套劇嘅賣點除咗有長澤正美每集不同職業嘅變裝外，隨時亂入都可以睇得明劇情呢點都非常吸引觀眾，有見 《信用欺詐師JP》喺日本網上引起熱話，最近官方正式宣佈，《信用欺詐師JP》會開拍電影版，地點仲要係喺香港添！

話說呢次《信用欺詐師JP》會原班人馬嚟到香港，屆時會有竹內結子飾演香港黑道「人馬座集團」嘅大家姐ラン・リウ，佢擁有全世界最高等級嘅鑽石，個性冷酷無情，有「冰姬」稱號；另外三浦春馬則飾演天才戀愛詐欺師ジェシー，佢同長澤正美一樣，想奪走ラン・リウ擁有嘅鑽石。至於日劇版第一集中由江口洋介飾演被長澤正美呃走20億嘅黑道老大．赤星榮介，將會繼續出現喺電影版中，決定向長澤正美等人尋仇。

目前預計日本會於5月17日上映《信用欺詐師JP》電影版，唔知香港又幾時先上映呢？一齊睇睇預告先！