唔少男士都鍾意睇運動類嘅熱血漫畫，如果當中加入埋巨乳元素，係咪更加引人入性先？唔好意思，打錯字，我指引人入勝。如果你都認同呢條Formula，咁嚟緊一定唔可以錯過《流汗吧！健身少女》呢套動畫喇！

《流汗吧！健身少女》（日語：ダンベル何キロ持てる？）係《拳願阿修羅》嘅作者三肉必起·牙霸子原作、MAAM作畫嘅日本漫畫，講述就讀皇櫻女學院嘅黑肉巨乳女高中生紗倉響為咗減肥，同黑長直嘅千金大小姐奏流院朱美一齊加入新開幕嘅健身俱樂部「SIVERMAN GYM」，並喺嗰度遇見健身教練街雄鳴造，向佢學習如何健身。之後兩人嘅同學上原彩也香、轉學生吉娜·波特及佢哋嘅老師立花里美都加入埋一份。而故事基本上以單元劇為主，每一話會介紹一種健身姿勢、器材或建議嘅飲食方式。男士們可以一邊欣賞美麗嘅肉體之餘，仲可以增長健身上嘅知識，真係一箭雙鵰呀！

而嚟緊呢套咁有教育意義嘅漫畫將會改編成動畫，由動畫工房擔綱製作、山﨑みつえ擔任監督，預計動畫2019年夏季新番播映。