作為一名職業運動員，要想長期保持最佳狀態，盡量將生涯延長，並唔係講咁易，佢地需要好多嘅犧牲及自律先可以換來長期嘅巔峰狀態，就好似NBA嘅LeBron James、足球嘅C朗拿度等傳奇。以上兩位球員都係絕對地自律嘅運動員，不過可能都唔夠NFL傳奇四分衛Tom Brady咁誇張！

現年已經41歲嘅Brady，仍然係NFL嘅明星選手，甚至2017年嘅超級碗佢仍然係賽事嘅MVP，絕對係長青嘅選手。更令人驚訝嘅係，NFL係一個充滿碰撞嘅聯賽，球員生涯一向都唔長，但Brady卻可以長期屹立不倒，至今已經喺NFL征戰19年之久，當中究竟有咩秘密呢？

據報導指，Brady嘅食物80％係素，其餘20%即係瘦肉，其後就係大量嘅水，佢基本上每日會飲12-25杯水，以保持身體擁有足夠水份。不過，其實呢啲都只係佢健康生活嘅開始。

而更深入去睇，Brady唔會食茄科類嘅食物，即係好似薯仔、茄子、辣椒等，因為對於某部份自身免疫系統有疾病的人，呢類食物可能會帶黎問題，例如腸道炎症等。

Brady亦都唔會將蛋白質及碳水化合物混合一齊食用，雖然呢個並無科學驗證會帶黎好處，但可能純粹係Brady個人嘅喜好。另外，佢亦都只會食用有機食物。

而身處美國，一間熱愛咖啡嘅國家，Brady係從來唔會飲咖啡的，因為某啲人對咖啡係會敏感的，特別咖啡因可能會令運動員嘅表現下跌。

除左以上之外，Brady亦遠離乳製品及碘鹽，其中唔食用碘鹽可能會帶黎甲狀線問題，但好顯佢有自己嘅方法去避免。

Brady能夠長久保持巔峰狀態，明顯健康飲食係最大嘅原因，唔食呢樣唔食個樣好似就得，但要真係要食得咁清，又咁嚴格都真係唔係咁容易做到，就算其他嘅職業球員亦唔係話想做就得，因此真係要對Brady報以萬二分嘅佩服！