英國倫敦嘅「華納兄弟哈利波特影城」一向都係哈利波特迷嘅聖地，裡面有齊《哈利波特》中出現過嘅知名場景，比如「九又四分之三月台」、「霍格華茲」等等，而最近官方就有一個新消息帶畀大家，就係喺今年4月6日，「哈利波特影城」將會首次開放「古靈閣巫師銀行」！

「古靈閣巫師銀行」位於倫敦斜角巷，係英國魔法世界內唯一嘅巫師銀行，主要由妖精經營。海格曾經講過，「古靈閣」係除咗霍格華茲以外最安全嘅地方，只有癲咗先會想去搶劫「古靈閣」。

「古靈閣巫師銀行」外觀係一棟高聳嘅白色建築物，要透過一組青銅門以及一扇銀色大門先可以進入大廳。銀行裡面，巫師或女巫客戶於金庫裏存放嘅金錢及其他貴重物品，將受到一個非常嚴密複雜及保安措施保護。金庫於倫敦地下伸延至幾英里外，並可透過乘坐魔法導航嘅拉車沿住粗石通道高速滑行到達。至於重要嘅金庫則由龍去把守。另外，「古靈閣」亦會提供兌換麻瓜錢幣嘅服務，妖精會設法讓麻瓜錢幣持續流通。

喺「哈利波特影城」中嘅「古靈閣巫師銀行」，可以見到上面有條龍，裡面則會展出電影中所出現嘅妖精服裝道具，有興趣嘅巴打千祈唔好錯過！