皇馬雖然今季四大皆空應該走唔甩，但係佢地痛定思痛，決定請施丹翻黎重建皇朝。今次施丹回歸執教，人工、權力都大升級，預計今夏佢將會大灑金錢組建自己想要嘅陣容，來季應該都幾有睇頭。而唔使等到今年夏天，施丹嘅魔力已經開始改善原本問題多多嘅皇馬。

喺施丹回歸前，其中一個令皇馬頭痛嘅問題就係巴利，呢位身價高但效率低嘅前鋒，喺蘇拿利手下時機會唔多，而佢與皇馬嘅隊友亦都疑似有心結，曾喺比賽入球後拒絕與隊友們慶祝，又喺球隊比賽完結前就已經離開球場。

雖然巴利今夏仍然好大機會被施丹甩賣，但係施丹好似已經大大改善左巴利與球員們嘅矛盾，就喺與切爾達嘅比賽，巴利唔單止為球隊攻入一球，佢更加於入球後主動與隊友們擊掌擁抱慶祝，甚至顯露好耐唔見嘅笑容。

對於皇馬黎講，見到巴利重捨佳態，又能夠改善與隊友們嘅關係，絕對係一個非常好嘅消息。而呢個正正就係施丹特別嘅能力，作為傳奇球員佢擁有令球員們順服嘅背景及實力，佢能夠將一眾球員變成一個真正嘅團體，呢一點真係唔到你唔服。

除左巴利，施丹亦都成功激活伊斯高及拿華斯，後兩者今季一度完全失去位置，但施丹回來後即時重用兩人，而佢地亦都用好表現黎回報施丹。識得用人係施丹嘅強項，佢深明輪換嘅重要，而唔係好似此前蘇拿利咁用死一班球員，唔單止耗盡正選球員體力，更令後備球員覺得自己唔會有機會上陣，從而變得消極。

如今皇馬已經重返正確嘅軌道上，相信來季佢地一定會再次震動歐洲球壇。