今年夏天轉會窗，車路士因為被FIFA穩罰禁止註冊球員，因此亦代表佢地唔能夠收購新球員。不過，隊中核心夏薩特卻一直同皇馬眉來眼去，同時皇馬亦都已經正式對夏神報價，所以預計夏薩特今夏離隊基本上已經事在必行。雖然夏薩特離隊看似已經無彎轉，但車路士方面卻想利用人情牌去留下呢位核心。

夏薩特與車路士嘅合同在2020年夏天就會到期，而球員又一直唔願意與球隊續約，所以為免人財兩失，車路士今夏都理應將佢賣掉。不過，由於車路士未來兩個轉會窗都應該唔能夠買人，所以如果呢個時刻失去夏薩特的話，將難以搵人彌補其位置。

而車路士要阻止皇馬出價已經無可能，所以佢地只能夠從夏薩特方面入手，佢地希望用人情牌打動夏神。球隊求夏薩特好似2016年基沙文對待馬體會一樣，喺球隊唔能夠買人下與球隊續約，後者最終選擇留低與球隊共渡時艱。

對於夏薩特黎講，加盟皇馬係佢一直以黎嘅夢想，而夢想已經放喺佢面前，只要佢要加盟基本上車路士已經阻止唔到佢。不過，2012年起加盟車路士嘅夏神，究竟會唔會念過去7年嘅舊情，去選擇幫球隊渡過呢段艱難嘅時刻呢？各位球迷真係要拭目以待！