NBA最年輕嘅MVP Derrick Rose，經歷左兩次大傷之後今季打出回春表現，甚至可以與其奪得MVP嘅賽季相提並論，令唔少球迷感到非常驚喜。可惜嘅係，Rose再一次因為手肘受傷而報銷，令人再次擔心其生涯是否又亮起紅燈。

現年30歲嘅Rose，過去兩季都效力木狼，而黎到今夏佢將會再次成為自由球員，究竟佢可以留喺木狼？定還是加盟其他球隊？甚至佢會唔會選擇就此退役離開NBA呢？

有消息指，Rose嘅經理人表示佢地正積極考慮讓Rose回歸公牛，佢認為Rose仍然係一名非常有實力嘅球員，所以佢唔排除任何可能性，而佢地亦都會了解清楚公牛嘅需要。

經理人又表示，喺Rose心目中公牛一直長存，而佢地唔知公牛會有咩下一步行動，但如果佢地想招攬Rose，咁佢地會保持開放嘅態度。

作為公牛當年選中嘅狀元，Rose喺球隊慢慢成長為一名超級巨星，並喺2011年奪得常規賽MVP，成為NBA歷史最年輕MVP得主。不過，其後因為膝部重創Rose需要長期休養，最終離隊轉投過紐約人、騎士及現在的木狼。

對於Rose黎講，芝加哥一直係佢嘅家，佢表示自己永遠都唔會離開芝加哥，佢仍然喺芝加哥有自己嘅居所，而其兒子亦都會喺呢個地方成長。

對於公牛嘅球迷黎講，佢地都非常希望球隊可以重新簽回Rose，並讓佢未來可以喺球隊退役。當然現在Rose應該未有退役嘅想法，但其身上已經有非常多嘅傷患，能否繼續長時間支撐落去令人擔心，所以真係唔知到Rose會否完成下一季後就會選擇退役，真心希望佢可以健康繼續打落去呢！