《名偵探柯南》入面，女主角小蘭個Friend「鈴木園子」一直都係以頭箍將頭髮箍晒向後嘅短髮造型亮相，大家都好好奇，究竟園子有瀏海會係咩樣呢？其實一路以嚟都唔少網友討論過呢個話題，亦有繪師ff過園子有瀏海嘅模樣再畫出嚟，但始終唔係官方嘅樣，當然唔能夠滿足大家啦。

不過估唔到，今次《名偵探柯南》劇場版，終於出現園子有瀏海嘅模樣，驚豔一眾粉絲！

其實之前《名偵探柯南：往天國的倒數計時》裡面，園子都有改變過髮型，不過大多數網民都認為佢當時佢個頭set好晒，未算真正放晒瀏海嘅園子。

而今次劇場版，終於可以見到園子放晒瀏海嘅樣！有網民就放上Twitter同大家開心Share，結果造成熱話，唔少人都話園子有瀏海實在靚太多！顏值完勝小蘭添！大家又點睇呢？