絕地反擊、超級逆轉、逆轉無限都可以係尋晚歐聯利物浦反勝巴塞嘅形容詞。由首回合作客輸比巴塞三球，外界一致看淡利物浦將止步四強，到最後喺晏菲路下半場連入三球奇蹟反勝，實在係一場熱血到癲嘅賽事。

而呢場比賽入面，利物浦一共喺巴塞身上狂轟四球，其中頭三球其實都入得幾靚，當中韋拿老母...韋拿杜母至真，佢個人入嘅第二球係頂得非常美妙的。不過，講到今場最精彩嘅入球，當然就一定係第四個入球，亦都係今場為利物浦奠勝嘅入球。

利物浦第四個入球，入球嘅係奧歷治，但係帶來呢個入球嘅係利記年輕右閘阿歷山大阿諾，因為佢嘅視野及機智，成功創造出呢個關鍵入球。

一開始負責開角球嘅阿諾，原本正想與隊友交換，但佢睇見禁區嘅巴塞球員未有準備好防守，而隊友奧歷治又無人看管，所以佢決定折翻快速開出地波，等巴塞球員知道發生咩事嘅時候，一切已經為時已慢，奧歷治已經輕鬆射入反勝嘅一球。

賽後唔少人都給予阿諾極高嘅評價，甚至認為呢個角球係「歷史最佳角球」。而阿諾本人則表示：「當時我只係其本能反應，只要見到機會，呢個時刻總會來臨，而奧歷治反應亦好快，佢係一名頂級射手。」

作為利物浦青訓嘅阿諾，現年其實只有20歲，佢2004年開始加入利記青年軍接受訓練，當時佢只有6歲。直到2016-17球，阿諾終於被提升至一隊，當然上陣嘅機會並唔多，全季就只係上陣左12場，但可以睇得出其潛力相當不俗。2017-18球季，阿諾獲派上陣嘅機會逐漸增加，並喺2017年8月獲得首個效力利記一隊嘅入球。

今次阿諾嘅角球為利記帶黎關鍵勝利，相信佢喺球隊嘅未來將會更加光明，如果最終利記真係可以奪得歐聯冠軍，呢個角球嘅歷史性將會變得更加更加大！