「格鬥狂人」徐曉冬自從兩年前用上10秒就將楊氏太極拳傳人雷雷KO後，就正式展開其打假之旅。期間被徐曉冬打敗嘅師傅都唔少，而最新嘅就係詠春點穴師傅呂剛，後者被打至鼻骨骨折。

不過，正所謂上得山多終遇虎，徐曉冬原來喺2017年曾喺接受媒體訪問時辱罵陳式太極拳傳人陳小旺係狗及騙子，又聲言對方之前的一場比賽係收錢打假的。因此，陳小旺決定入稟法院控告徐曉冬侵害其名譽，要求對方作出賠償及道歉。

其後法院喺2018年10月作出裁決，法院認為徐曉冬侵害陳小旺嘅名譽，要求其作出賠償及道歉，而賠償費加埋律師費等費用合共超過4萬6千元人民幣。不過徐曉冬不服判決，因此決定上訴，但最終上訴被駁回。

及後徐曉冬按判決作出賠償，但卻拒絕道歉，因此今年4月法院判處徐曉冬「有履行能力而不履行生效法律文書確定義務」，令呢位格鬥狂人被列入「失信被執行人名單」，亦代表佢喺中國將會被剝奪多項權利，其中包括：禁止乘坐飛機、列車軟卧、限制在金融機構貸款或辦理信用卡、禁止在星級以上飯店、酒店、夜總會或高爾夫球場消費等等。

而徐曉冬對於被國家降為D級公民後，喺網上哭訴自己嘅慘況，其中佢需要化名為「徐冬瓜」先可以參加比賽。睇黎徐曉冬黎緊嘅日子都應該會幾難行，而一眾中國功夫傳人會唔會亦都鬆一口氣呢？