話就話「夏日炎炎正好眠」，但事實係夏天熱屎辣辣冇覺好瞓就真！如果你想慳返啲電費唔開冷氣之餘，都可以體會心靜自然涼咁瞓覺，咁建議你遲下臨瞓前睇睇日本恐怖動畫《暗芝居》，包你嚇到心都涼，不過到時仲瞓唔瞓得著，就係另一回事喇……

《暗芝居》（日語：闇芝居，やみしばい）係2013年7月14日開始喺東京電視台播放，以都市傳說為題材嘅日本短篇動畫，去到今年7月已經做到第七季。

《暗芝居》會模仿「紙芝居」，由說唱藝人開場去講故事。原本「紙芝居」呢種紙上戲劇，係日本昭和時代流行嘅街頭藝人表演，藝人會準備放有繪本嘅木製舞台，搭配一張張圖片以說唱進行演繹，而且通常係面向兒童嘅演出，不過《暗芝居》嘅故事就相當「兒童不宜」，講嘅全部都係悲慘而又離奇的恐怖故事……

《暗芝居》第七季嚟緊將會於7月開始放送，擔任紙芝居老闆嘅聲優依然係津田寬治，鍾意睇恐怖故事嘅巴打萬勿錯過！