{ SKIP }
文:MenClub 熊熊  圖:互聯網
POSTED ON 10 Jun 2019

早前,任天堂公佈咗新一代(第八代) Pokémon 嘅消息,副題為《劍》與《盾》。日前新一片Pokémon Direct 影片更透露新嘅Pokémon 以及新嘅原素,更重要嘅係,公佈埋推出嘅確實日期,絕對令人為之期待。準備好年尾迎接新一代Pokémon啦!

新公佈名單包括:「毛辮羊」、「暴噬龜」、亦有公佈會進化嘅「幼棉棉」→「白蓬蓬」、另外有一隻比較特別係「鋼鎧鴉」,介紹入面話佢係的士?唔通好似Pokémon Let's Go 咁,係劇情技能?

另外原有嘅元素「曠野地帶」可以隨住唔同天氣遇到唔同Pokémon 已經唔係咩特別事,而釣魚同搖樹亦唔係啲咩新事物,不過今次去咗Switch 演譯,相信趣味性一定更高。

今次公佈一個重點,就係─「極巨化」。究竟咩係極巨化?聽個名好似有啲熟悉...

「極巨化」即係將Pokémon 用咗張遊戲王嘅「巨大化」變到勁巨型,而且招式都附有「極巨」兩個字,而且能力只能維持3個回合,之後就會漏氣,變返正常size,而且唔同Mega 咁,得指定嘅先有得「極巨化」,而係每款都得,唔知亞羅拉版嘅椰樹獸會變成點呢?升到上天?

喺遊戲入面更加可以連結其他玩家一齊打團體戰,名為「極巨團體戰」。嗱~之前我話咁熟悉就係佢啦─「團體戰」、「巨大化」、「Premier Ball」(白波),你仲唔係Pokémon Go...哩個團體戰得一個玩家可以「極巨化」,睇嚟係要用唔同玩家「極巨化」嚟輪佢大米...

而「極巨化」亦會加入道館戰中,所以,「極巨化」將會係遊戲關鍵嘅玩法之一。只係希望唔好變咗卡進度嘅玩法。

今次公佈嘅重點嘅人物角色,包括今次嘅博士─木蘭博士,伽勒爾冠軍─丹帝,以及冠軍細佬主角嘅勁敵(提款機)─赫普。相信遊戲嘅完成度都已經好高,11月推出時應該同Demo畫面大致一樣。

片中最後2分鐘左右時間,更公佈本集主題嘅傳說(神獸)Pokémon,劍嘅「蒼響」以及盾嘅「藏瑪然特」。顏色以紅白藍金嘅配搭,非常搶眼,似乎佢哋會通山走,喺伽勒爾地區周圍走。

睇睇Pokémon Direct 完整嘅影片:

Pokémon SWORD / SHIELD (劍/盾)

遊戲平台:Switch
遊戲類別:育成RPG
推出日期:2019年11月15號
價錢:未定
支援語言:日文・英文・西班牙文・法文・德文・義大利文・韓文・繁體中文・簡體中文

又一個冠軍!
hobby
【連續三年】「火箭」上海大師賽再奪冠!
16 Sep 2019
好好享受生活吧!
hobby
【真男人】李宗偉掛拍後終向老婆兌現承諾!
16 Sep 2019