《福布斯》最新公佈嘅年度最高收入運動員榜前三位，由足球員包辦，佢地分別係美斯、C朗以及尼馬，其中排名第一位嘅美斯收入高達1.27億美元，而C朗則為1.09億美元，估唔到嘅係岩岩一年傷多過踢嘅尼馬收入都有1.05億美元，相信其中好大部份係因為佢喺PSG嘅人工仲要高過C朗。

不過，尼馬高據第三嘅情況明年應該難以見到，因為佢場上場下嘅形象都越來越差，令一眾廣告商開始拋棄佢，預計佢嘅廣告收入將會因此而大幅下滑。

作為巴西隊嘅核心，喺巴塞表現又令人滿意，尼馬本來實力已經被外界肯定，但喺世界盃嘅插水及不斷碌地嘅情況令球迷開始對佢有負面印象。而近來尼馬更捲入強姦案，其形象可以話直插谷底。

據最新嘅消息指，有廣告商不滿尼馬嘅負面形象，已經宣佈終止雙方嘅合作，佢地分別係萬事達卡及吉列剃鬚刀。而除左呢兩間公司外，Nike及Red Bull都非常擔心尼馬嘅負面形象會影響到佢地，所以非常關注事情嘅走向。

雖然尼馬已經表達自己係無辜的，但由於查證需時，所以目前尼馬都唔可以100%確認係無做過。如果最終確認尼馬係真係有強姦，咁相信唔單止佢會失去所有廣告商，隨時要承擔坐監嘅後果。