《太空也入樽》(Space Jam)呢套電影可以話係由NBA球員主演嘅經典之一，因為當時嘅主角係「籃球之神」Michael Jordan，所以唔少人都非常支持，最終電影嘅口碑都係相當唔錯的。而黎到今日，「大帝」LeBron James有意將經典再現，佢將會喺今個暑假正式開拍《太空也入樽2》，並將邀請多位NBA現役球星一同主演。

據最新嘅消息指，《太空也入樽2》主角當然係LeBron James，而佢亦已經邀得多位NBA及WNBA球星座陣，佢地分別有岩岩同LeBron成為隊友嘅Anthony Davis、Damian Lillard、Klay Thompson及Chris Paul。另外，WNBA嘅球員則分別有：Diana Taurasi、Chiney Ogwumike及Nneka Ogwumike。不過消息指，仲有幾位球星可能會參演，大家可以期待下。

當然，球迷們一定想見到好似Stephen Curry、Kawhi Leonard、James Harden等嘅超巨球星一齊參演，但因為佢地並唔係同一間籃球鞋品牌代言人，所以可能需要更多時間去傾談合作方法，所以唔代表佢地最後唔會喺電影中出現的。不過最新嘅消息指，因為日程問題Curry已經拒絕拍攝呢部電影，相信一班球迷應該都相當失望。

預計今次LeBron James主演嘅《太空也入樽2》，應該都會與第1集相類似，亦即係話呢班籃球巨星將會再次與華納動畫嘅卡通角色，好似賓尼兔、德菲鴨、翠兒等聯手打籃球。相信喺相隔23年後，新一套嘅《太空也入樽》應該會有更精彩嘅CG鏡頭，令電影變得更加豐富。