軌跡會有完嘅一日，而球員嘅生涯亦都一樣，總會有掛靴嘅一天。而擁有絕技「洛賓的軌跡」嘅荷蘭球星洛賓，今日亦正式宣佈掛靴，結束自己19年嘅球員生涯。

現年35歲嘅洛賓，黎到今日頭頂上嘅髮絲已經所餘無幾，而其足球場上嘅餘暉亦已經黎到盡頭。由於較早前時間，已經得知洛賓會離開效力10年嘅拜仁慕尼黑，所以最終佢決定選擇退役亦都唔算太令人驚訝。

洛賓表示：「所有人都知道，我喺拜仁完成最後一場比賽後，花左唔少時間去決定未來。而現在我決定結束我嘅職業球員生涯。」

洛賓職業生涯由2000年效力荷甲球隊格羅寧根開始，至今19年時間從來都不乏冠軍獎盃，其中包括12次聯賽冠軍(1次荷甲、2次英超、1次西甲、8次德甲)，另外佢亦都隨拜仁喺2012-13球季成功奪得其生涯唯一一個歐聯冠軍。

而作為一名左腳球員，洛賓生涯創話出一招為球迷所熟悉嘅超級絕招「洛賓的軌跡」，就係左腳推大位射遠柱，雖然防守球員及門將基本上都知道佢一定會咁射，但係就係點都防唔住。

其實本來以為洛賓離開拜仁後可能會轉到其他較為低組別嘅聯賽繼續球員生涯，但預計可能近年佢多次受傷患困擾，所以最終選擇提早掛靴，專心保護好自己身體，展開自己嘅新一頁。