日本目前最受歡迎嘅漫畫之一《一拳超人》，近期開始推出多款產品及電子遊戲，其中《一拳超人 無名英雄》(PS4 / XboxOne / STEAM) 預計將會好快同各位Fans見面，而遊戲最新一波嘅宣傳片亦都正式公開。

今次遊戲最新嘅宣傳片，可以睇到多位漫畫嘅主要角色，好似主角埼玉老師；S級英雄：傑諾斯、龍卷、銀牙、原子武士；怪人：深海王、蚊女等等，而其中埼玉老師就更加係今次傳宣片嘅主角，因為大家都好想知道必定可以一拳KO對手嘅埼玉究竟喺遊戲中係點運作。

原來遊戲設定係如果你想用埼玉，就只限3vs3嘅嘅對戰，而且你開始嘅時候就只有兩名角色可以出戰，要等待指定時間倒數完結後，埼玉老師先會趕到現場，屆時無敵嘅佢就可以一拳KO對手。

當然喺倒數階段要以2敵3並唔容易，但係如果你技術夠，能夠有效避開對手攻擊，又或盡量減低傷害，只要捱到埼玉老師趕到，一切就可以逆轉！