巴西球星尼馬作為世界最高轉會費嘅球員，自2017年加盟巴黎聖日耳門後，已經助球隊連續兩屆奪得法甲冠軍，基本上可以話完全統治法甲聯賽。不過，一直有傳尼馬心郁郁想重返巴塞，而今夏亦都有消息指巴塞有意簽回尼馬，但睇怕黎到今日尼馬要好夢成空。

距離轉會窗關閉仲有唔夠一日，除非有咩突破性發展，否則黎緊半季尼馬都會繼續係PSG嘅球員。對於尼馬回歸，唔少巴塞球迷都表示拒絕，因為覺得當日係呢位巴西前鋒拋棄球隊的。

另外，要簽回尼馬巴塞就要花費巨額轉會費，講緊嘅至少都要2億歐元，天價花費將會令巴塞陷入財務風險當中，所以大部份人都覺得重簽尼馬係不值得的。而唔想花費咁高嘅轉會費，加入球員係可行嘅辦法之一，所以巴塞曾經考慮將拉傑迪、迪比利或圖迪保加入交易中，但三人全部都唔想離開巴塞。

而尼馬嘅交易唔單止影響巴塞，PSG方面亦有明顯嘅問題出問，特別係尼馬一直都高調表達對巴塞熱愛之情，好似會提到自己仍然回味當日6:1大炒PSG，咁樣試問PSG嘅球迷又如何支持呢位球員。

當然對於PSG教練黎講，尼馬仍然在隊中絕對較失去更好，始終尼馬都可以令球隊實力更強，但如今嘅PSG更傾向係麥巴比嘅球隊，所以尼馬必須接受呢一點，否則問題又會越搞越大。

唔經唔覺尼馬已經27歲，從以往被評為可以接班C朗及美斯嘅世界第三球員，如今已經變得可有可無，又或者其印象實在太差，令球迷們都唾棄他。