黑膠轉盤從來都唔會過時，尤其當佢成為藝術家靈感題材嘅時候，放個黑膠轉盤喺大廳絕對可成為家居藝術嘅焦點，來自伊朗嘅產品設計師 Elham Mirzapour就以土星作為靈感， 創作出“ Saturn” 黑膠轉盤， 表達土星連帶土星環以及土星衛星泰坦，一睇就知道係天文學與現代設計完美整合。黑膠轉盤照睇就知唔係為咗音響發燒友設計，純粹吸引同設計師有共同品味嘅現代藝術愛好者，心動嗎？ 有冇打算買個「土星」放喺大廳。

睇起嚟佢確實有土星嘅形態， 土星嘅光環圈圍繞著主體旋轉， 自行星嘅旁邊有小小衛星泰坦，作為一枝特別嘅唱臂抓取黑膠坑紋播放音樂。簡單以音響角度講，土星係一組轉盤的平台，一體化由球壯主體放置係轉盤平台中心頂部，延伸出一支唱臂進行播放，唱臂包含一支唱針。 操作非常簡單只需要接駁電源，放好唱片安置球狀主體然後按開關掣，仿照一般唱盤操作方式 ，望住黑色黑膠係土星上面轉下轉下即可，立時將人與天文學相互結連。

一個設計獨特靈感灌注嘅現代化音響設計，肯定係靈感先行藝術為上，對音響發燒友嚟講出到聲已經係贏咗，相信目標觀眾都唔係真正玩音響朋友。 亦都唔係事事以成本用料猜度的一般家庭用戶，土星轉盤主要以塑膠作為物料組成， 配有兩個摩打引擎為其提供動力，配搭現代家居優美設計， 斟一杯紅酒， 播放行星組曲古典音樂，將會係一個完美嘅銀河聲音旅程。 設計師並未為土星黑膠轉盤制定價格， 所以我哋好有理由相信藝術係無價。