80年代嘅人可能都曾經隨身帶住MP3隨身播放機甚至便攜式隨身CD機通街走，當年科技未有今日發達，週街聽歌隨身MP3係青春潮流，後來由ipod帶領推到便攜播放器的高峰。近年便攜式HiFi級播放器由韓國品牌領導市場，用最新科技復古有無得諗呢？中國山靈就嘗試集天下大乘兜大圈去外國眾籌網發售全新hifi隨身音響播放器Q1，新科技方便好聲價錢平望落仲成部apple watch咁，你會唔會花七舊水支持下發燒級中國好聲音？

山靈電子發跡於深圳，係第一批打起名堂的中國音響公司，不過佢的出名多數在於強大的實力甚至收購海外的HIfi影音品牌，例如收購左法國YBA等等威水史，大大增強自身實力打響名堂。近年，除了音響本業，山靈走向便攜播放的市場，去年推出M0播放器，極像Apple watch外型，如今又推陳出新以Q1的新型號在海外發行，係一部全能細小的骰可愛嘅多功能播放器，係舊款M1播放器的升級版，性能同設計上作出徹底的改造

山靈Q1依然同M1一樣屬於細小精巧 高性能音樂播放器， 不過就大膽採用80年代經典風格進行設計。 包括有傳統物理點擊以及復古嘅音量控制旋鈕。Shanling Q1 擁有更大嘅屏幕， 對於音樂檔案信息顯示清晰易見。屏幕配備採用Shanling第三代MTouch操作系統的觸摸感應器。

憑藉節能的組件平台和更好的電池容量（1100mAh），Shanling Q1播放器可連續使用長達21小時，並能夠高速2小時內充滿電。Shanling Q1的藍芽性能強大，由於改進了天線和新的膠蓋面，接收效果更加穩定。機仔細細尺寸為75 x 62 x 16.5毫米，重136.8g，配備2.7英寸觸摸屏，解像度為360 x 400，可在Shanling的MTouch操作系統上運行， 外插Micro SD存儲卡最多可以支援2TB。

係音樂播放方面，Shanling Q1支持大多數流行的數碼音樂格式，例如APE，FLAC，ALAC，WMA，AAC，OGG，MP3，OPUS，WAV，AIFF，DSF，DIFF ...，內置使用解碼晶片組DAC ESS Sabre ES9218P可以播放PCM 384kHz / 32 bit音樂制式，DSD64以及DSD128等等高清格式。Shanling Q1通過藍芽4.2（LDAC，AAC，SBC / aptX）進行無線連接，配備3.5mm輸出端口，容量為80mW（32歐姆），可直接用作USB DAC使用。

實際上山靈吸收咗法國YBA等外國音響廠的技術， 喺聲音質素上面有好大嘅改進， 當然唯一為人詬病嘅來自佢中國特色的「抄風」式設計同中國品牌呢個心理難關。如今佢喺外國 Kickstarter眾籌網站做緊早鳥優惠只需要699元港幣就可以擁有一部，如果對比起同樣規格的韓國音樂播放器嚟講價錢係非常便宜，可能佢真係成也中國敗也中國，又如果轉用法國YBA個名出會唔會易入口一點？ 我敬佩佢夠膽一直強調中國深圳山靈，中國製造，有時你大大方方唔閃閃縮縮我反而覺得你有腰骨 ，唔鐘意大不了唔買你。有麝自然香