較早前同大家報導過，日本環球影城將會與任天堂合作興建一個「Super Nintendo World」主題園區，內裡將出現任天堂過去不同嘅角色及場景，令人仿如置身於任天堂世界一樣。

除左之前園區內興建中嘅場景相片外，今日官方再釋出一條有關園區嘅MV，我地可以從MV入面得知園區內部份玩樂體驗嘅情況。

今次由官方釋出嘅MV名稱叫「WE ARE BORN TO PLAY」，由Galantis及Charli XCX 攜手合作推出。MV中間公開左主題園區中一個特別設備「力量提升手環」，當玩家黎到園區購買呢隻手環，並下載專用手機App，咁你就可以好似Mario一樣於園區內尋找金幣或星星等道具。

而遊戲App將會即時顯示現場所有有份參加嘅玩家排行榜，你將可以與現場玩家進行金幣收集戰，睇下邊一個將會係最出色嘅Mario。

另外，園區內亦有「關鍵挑戰」供玩家參加，而喺「關鍵挑戰」勝出嘅玩家將可以獲得「鎖匙」道具，然後利用「鎖匙」與其他玩家一齊參加「魔王戰」。

就咁聽都覺得今次呢個任天堂園區將擁有前所未有嘅遊戲體驗，園區預計於今年正式開幕，各位任天堂愛好者真係要拭目以待！