老實講，我個人對於英國Neat Acoustics有種獨特的偏愛，佢獨有甜美的英國聲，低頻強勁喇叭細小而且價位親民，細公司質量取勝，所以一但有旗下新產品，個人特別留意，呢間「蚊型」喇叭廠家又推出新書架喇叭Ministra，依然係細小慳位，但就大過早前佢地出哂名的IOTA系列細款，相信是入門級的平價產品，依然用上其廠必備iso-baric式的箱體設計，低音特別出色。

每年見到Neat Acoustics的場所一定係英國布裡斯托爾Hi-Fi展，Neat廠一人主理，非常細小所以全球大型音響展反而未必見到佢地，上年Neat Acoustics就推出Ekstra座地喇叭，今年就推出環球經濟放緩下平價入門級的書架喇叭取名Ministra。

Neat Acoustics Ministra是一對精緻細小的書架喇叭，以Ekstra的縮細的設計和技術為基礎，可以話Ministra是Ekstra座地喇叭的書架版。據報導，Neat Ministra的價格約為1795英磅，外形細對同一般入門書架差唔多，尺寸僅為30x17x29厘米，重量有8kg。

Neat喇叭的外表千年如一日，相當英國式，你話外型特別就肯定欠奉，不過結構就依然自成一派，具有複雜的底盤結構，內置三個喇叭單元，內有2個獨立的間隔用於低音單元和中高音單元。其中，廂體內通過厚木質隔板層隔開內裡另一個P1-R2中低音單體，形成iso-baric式的箱體設計，為Neat獨門的祕技，讓喇叭能夠提供更為優異的低頻下潛延伸

呢對喇叭據稱適用於非常細小同狹窄的空間，喇叭設計專門為細地方而設，可以將喇叭放係房間的某個角落或靠近牆壁的地方，唔怕反射和共震，咁當然廠方咁講你要信先得喎，我呢就未必完全信囉！老實！因為音響畢竟對空間敏感，愈靚空間愈易好聲！

不過我信服Neat Acoustics的iso-baric低音設計，覺得堅正，當然佢成間廠所有喇叭共同缺點就係喇叭相對唔太易推動，相當食功率，但推得掂的確又好聲又唔貴，純淨優美甜潤英國聲音。個人十分愛好。