如今武漢肺炎仍然肆虐全球，香港唔少人可以唔出街都會選擇留喺屋企，咁長時間留喺屋企又無嘢做點算好？有人可能會選擇打機、睇電視、煲劇等等，當然亦都有人會選擇大覺瞓。

而作為首當其衝盡量唔好出街嘅中國一份子，一位男子就選擇長時間喺屋企瞓覺，但係佢唔係就咁瞓，而係開住直播咁瞓。

一名叫做「誰家的圓三」嘅抖音直播主，就喺屋企悶得發慌之際選擇開直播瞓覺，奇就奇在喺兩日直播覺瞓後，其Fans數目由3.7萬狂升至80多萬，其中佢瞓覺嘅時候竟然超過1800萬人觀看，令佢獲得7.6萬人民幣收入。

睇黎中國方面唔少人都同「誰家的圓三」一樣喺屋企悶到失去常性，竟然直播瞓覺都可以有咁豐厚嘅收入，真係難以置信，睇黎小編我今晚都開住直播瞓覺，睇下第二朝起身會唔會發達先。