痠情之下，大家都儘量少與其他人接觸，唔好講食肆商店，我有個好鍾意用交友App嘅朋友都話，呢排就算同啲女女有幾好傾都唔敢約出黎見面。事實上疫情對世界最大交友App Tinder亦真係影響，不過就唔係少咗人玩，而係佢哋嘅自家互動劇將會延播。

你冇睇錯，Tinder，交友App嗰個Tinder，係拍咗套總共3集，每集五分鐘嘅自家短劇《Swipe Night》，而且只限Tinder App中觀看。故事講述小行星即將撞擊地球，而觀眾會以第一身角度於末世中求生，當中會遇到道德兩難或者重要選擇，觀眾就要Swipe左或右去決定劇情，而睇完之後Tinder就會話你知，你嘅決定同你啲配對脗唔脗合，大家又多咗個話題咁。

問題就係因為劇集嘅末世氛圍，Tinder認為喺依家疫情嚴重之下推出，並不是一個好選擇，所以原定今個週末開始於全球陸續推出，依家就會暫延啦！

另外Tinder最近亦於App內加上通知，提醒大家佢識「朋友」之餘，記住要保障自己——唔係叫你做安全措施，係叫佢勤洗手、用酒精搓手液、同唔好掂自己塊面，但就冇叫人戴口罩。