中國武漢肺炎疫情影響全球，世界第一大國美國亦不能獨善其身，餐廳商店關閉、活動賽事取消、市民日常生活同經濟都受挫，唔少公司、明星、球員、名人亦相繼出手幫助身邊嘅人。昨日「神奇女俠」Gal Gadot都喺IG發起咗一個行動，仲有Sia、Jimmy Fallon、Amy Adams、Mark Ruffalo、Natalie Portman、Cara Delevinge多位名人響應，但美國網民睇到完全唔Buy。

事關女神Gal Gadot發起嘅，係「一人一句接住唱《Imagine》行動」，其原意係用歌聲為大家打打氣，但喺一般市民眼中，佢以為咁做幫到人實在離地得太緊要。事實上一般美國市民最擔心嘅係疫情令經濟活動停擺，多個企業亦要求員工放無薪假甚至直接解僱，而受影響嘅大部都係本身已經捉襟見肘嘅低收入勞工。

失去工作收入嘅勞工紛紛前往申請失業救濟金，不單止令申領人數暴增、辦事處大排長龍，更加令到部份州份嘅救濟金存款急劇下跌。再加上美國各州份政府近年收緊發放救濟金嘅標準，令大量Part-time員工、臨時職位人士根本就冇辦法申請援助。呢個時候有人走出黎一人一句唱首《Imagine》你聽諗住幫到你，你都會大聲喝佢「咪煩啦」下話？

正如知名時事評論Youtuber Philip DeFranco於最新嘅影片所指，Gal Gadot明星嘅出發點可能係正面嘅，但對於處於「擔心緊下個星期有冇飯食」嘅一般市民黎講，嬲你又好應份咁囉。