Stay home乃世界大潮流，假如你壯志未酬還有雄心想出去玩，不如試試投入世上最安全的玩樂，音響影視世界。畢竟音響從來都係最令伴侶放心玩意。如果你想入第一套音響不論用來睇戲還是聽歌先決考慮點係先買一對喇叭，再配搭一部擴音機(AMP)，個人認為萬能的答案英國Mission喇叭將會係人生第一對喇叭的最佳選擇。選擇一對喇叭有幾個重點考慮，第一價錢要平最好能夠在一萬幾千以內，第二聲音質素要夠好最好睇戲聽歌兩相宜，第三外型要睇得放在家唔會似垃圾收賣場。如此這般英國品牌Mission ZX喇叭應該適合大部份人，無錯係我推薦的，相信如果你出去行幾圈做下購物研究，可能都會得出同我一樣的見解，Mission ZX唔係最好的喇叭但係入門第一對最好的選擇。

英國Mission向來係一間敢於創新的音響廠，專門走平價路線，從來都係大眾化，價錢就係皇道，所以一路以來講HIGHEND老老實實Mission未必High 得起，但用家依然絡繹不絕，證明金字塔中層永遠係商業最好的階梯。值得反思的一點，平是否一定唔夠好，平價可否好聲，平價可否highend？個人認為Mission是在奢侈品世界中不入流，因為太實用，放落電器世界會較為合適，吹得太遠，今日想講的係Mission  ZX系列喇叭，一隻隨便上網同行大型電器店就可能見到的喇叭，聲音上個人覺得其實都幾接近Highend大門，凡有人問及買咩野全新喇叭好，都係指向Mission。

今日主力推薦Mission小型座地的ZX-3喇叭，先講錢建議零售價為$13180 ，已經係Mission品牌中的旗艦系列的ZX系列，ZX系列產品相當完整，如果大家覺得自己家居細得好緊要就可下望其書架ZX-1，或你廳有200尺以上就上望大D的喇叭型號，反正由大到細ZX系列都有，而價錢都係入門級就有旗艦系列的聲音效能。 ZX-3 座地喇叭兩個 5.25 吋低音單元人聲中頻幼細、聲音亮麗，音場定位非常清晰分析力超卓，低頻量感充沛，衝擊力很強，係一種非常現代的傳真喇叭。個人認為座地唔駛加腳架易放美觀，所以ZX-3係適合大多數香港人的喇叭。

Mission廠有好多科技同聲學技術，例如：1978年就已有全球第一對聚丙烯（polypropylene）震膜單元的商業喇叭；1979年推出第一對也是廠方招牌式高音反轉置於中低音單元下方的「反轉式單體排列」（inverted driver array）喇叭產品。將高音反轉放於下方據廠方稱有助於高音與低音聲學路徑一致，更易營造音場氣勢。ZX 系列有Mission 的環狀圓頂高音單元，比起一般半球頂震膜具超高頻段更低失真好處，半球頂震膜一般有較舒適聽感，因為去到最高超高時可能有失真甚至上唔到(當然無法一概而論)，相對環狀圓頂高音有更高傳真度。加上白色美觀的圓滑鍋狀DiaDrive中低音單元，擁有非常生動的震撼低音。講聲真係無用，其實無論時下流行的影片還是任何對音響聲音的描述，最後都係要親身去試聽，自行體驗才知道自己所需。所以定好目標，搵個showroom，打個電話，要求清場，戴好口罩，自己去試，試完請馬上回家，不然喇叭送到我家，你無命享樂！

無論聲音同外觀Mission都有一種現代感，產品簡單兩種色調選擇，非黑即白兩種都非常迷人可觀。所以回應一下當有朋友問我想玩音響未想定AV影院還是兩聲道音響之路，我都會推薦佢入門最適合買的喇叭應該是Mission ZX喇叭系列。先去了解Mission再以此作為基本認知去品嘗其他不同選擇，會事半功倍，缺點是Mission的定價太屈機，會讓你以為音響界其他品牌定價都太貴。