51「黃」金週大家如果出左街無煲劇，有機會要睇返呢套一季八集台灣新劇《誰是被害者》，近期唯一有《我們與惡的距離》的魔力，法證題材加上強大演員陣容大爆演技，係最近韓劇以外大獲好評劇作。一講《誰是被害者》幾隻字係2020年今日真係引人遐想，無論係放諸全球定係近近地高尚情操怒斬暴徒，真係唔知邊個先係被害者！ 

串流平台 Netflix再一次睇中台灣劇，今次買入以刑事偵緝推理懸疑作主軸的台劇《誰是被害者》，今次呢部台劇並非Netflix親自參與製作， 純粹高價買入，但咁樣反而仲有看頭，因為過去經歷但凡Netflix 親自落手落腳拍的，可能都希望愈大有落差。呢部劇作一睇預告同簡介就令人諗起上年大熱台劇《我們與惡的距離》，呢類作品除左本身劇力萬鈞好睇外，仲帶出社會議題正反不同思辯，為社會底層發聲，賺人熱淚外仲做到發人深省。

由細到大睇開TVB的香港人，一定記得《法證先鋒》同《洗冤錄》等港式法證劇集，當然而家大勢已經少左人睇香港某大台劇作，「誰是被害者」長假開播後即時成為Netflix頭五名熱播作而且口碑強勁，呢套劇劇情主要係講⼀名亞氏保加症的鑑證官⽅毅任，在一起詭異的命案中，發現命案的關鍵證物，竟涉及失聯多年的女兒。為了隱瞞警局同事並私下找出真相，他冒險利⽤鑑證知識，誤導與他搭檔查案的火爆刑警趙承寬，同時與握有重要線索的嗜⾎記者徐海茵合作調查，⽅毅任終將發現，能讓真相水落石出的，不是他最擅長的鑑證知識，⽽是遺失已久深藏未露的情感...。

劇情精妙之處就等大家自己睇，介紹來講呢套野好多明星助陣，死左的被害者卡士比主角有過之而無不及，大家不妨留意下「被害者」當中，有三位曾經女神丁寧、季芹、林心如參演，而目全部大鬥演技。當然論搶鏡許瑋甯呢位女主角加上亞氏保加症的鑑證官張孝全肯定令人耳目一新。 除左演員有一點近年香港電視劇少有(有不過台都比人封埋！)的就係對社會的批判，呢樣野係台灣電視劇比較常見，可能由於社會有自由同民主，佢地對於社會議題的討論同批判絕對係華人社會中的先驅者。劇中就係有好多對社會現象嘅批判。 

此外，如果你見到溶屍死人會驚恐，唔好意思，呢套劇另一賣點就係強大化妝及視覺團隊，神級還原命案現場，劇中死屍真係太逼真，絕對唔適合合家歡電視台播放。 雖然只得八集但每一集都有看點，劇情層層遞進啟承轉合讓人欲罷不能。最重要係睇完呢套劇帶嚟嘅反思以及對社會的反省。不過記住我們身處香港，而不是台灣，我們的社會也許還有一點不一樣，值得我們繼續去追求和發聲。

如果你想煲劇，呢套台灣劇近期真心推薦。