疫情之下全球經濟受創，相信大家身邊都要放下無薪假、減薪甚至被裁員。而為咗幫補家計，我身邊都有啲朋友打多份兼職，去各大外賣平台送外賣。而日本近日就有個男人因為轉行送外賣而受到廣泛報導，皆因佢唔係普通人，而係奧運銀牌得主！

三宅諒曾經於2012年倫敦奧運中，代表日本奪得劍擊團體賽銀牌，隨後亦於國際賽有好成績。大部份職業運動員都係靠贊助商提供資金，以供生活、訓練及出國比賽之用，但因為一個武漢肺炎令日本經濟受挫，三宅諒嘅贊助商受影響下決定暫緩續約，導致佢瞬間變成零收入，唔好講每個月67萬Yen (約HK$4.8萬)嘅訓練費，連食飯都有問題。為解燃眉之急，佢由4月30日開始加入Uber Eat踩單車送外賣，仲好正面咁話貪踩單車可以當做運動添。日本電視台拍攝咗佢第一日返工嘅情況，頭兩個鐘賺咗1500Yen，整日收入為4688Yen，即係HK$340左右。

另外由於肺炎疫情，東京奧運延期一年，打亂三宅嘅訓練計劃，失去目標嘅佢坦言呢段時間相當難過，但佢依然認為「只要確實做好眼前的每一件事，必定能夠搵返自信。」假如大家都受疫情影響生活，或者都可以學下三宅諒嘅正面思維。