因為紀錄片《The Last Dance》嘅播映，令「籃球之神」Michael Jordan再次於籃球圈掀起熱潮。日前，一對Jordan於1984-85球季(新秀球季)著過嘅Air Jordan 1，以56萬美元成功拍賣出，刷新波鞋歷史售價紀錄！

呢對AJ1，除左係Jordan新秀時期著過之外，上面亦有其親筆簽名，所以可以話珍貴程度爆燈。而當初據拍賣公司估計，拍賣價大慨15萬美元，但最終於拍賣最後20分鐘，價錢不斷上升，最終以56萬美元作結，足足係最初估計嘅3倍有多。

今次拍賣成功刷新波鞋售價紀錄，此前紀錄為$437,500美元，該對波鞋係Nike創辦人Bill Bowerman為1972年奧運設計而成12對Moon Shoe嘅其中之一。

作為呢對MJ1嘅原擁有人，Jordan Geller表示今次將鞋拎出黎拍賣，全因為覺得《The Last Dance》播放後，Jordan熱潮必定升至頂點，所以喺呢個時間點拎出黎絕對係最佳時機。