萬眾期待嘅Naughty Dog新作《The Last of Us Part II》今日上市，對前作嘅愛、各大遊戲網站嘅極高分評價，再加上各種新系統、新敵人，相信大家都對呢隻Game充滿期望。但遊戲面世後，評分網站Metacritic上嘅用家評分僅得3.4/10分，超過2800個評分中有2000個都係負面評價，外國討論區Reddit更加充滿冷嘲熱諷，究竟發生咩事呢？

圖片：The Last of Us 2 官網

圖片：截圖自Metacritic 

以下含劇透！

以下含劇透！

綜合外國網民嘅討論，《TLoU2》最為人詬病嘅係佢個故事。

據玩家評論，一個預告中睇落非常重要、大家又好喜愛嘅角色，因為做咗件唔符合前作性格兼且戇居嘅事早早被殺，Ellie亦因此踏上復仇之路，令好多本身對上集劇情充滿愛嘅玩家大失所望。而且中途有一半時間玩家都要操縱殺死角色嘅「仇人」，遊戲設計者亦明顯試圖令玩家「體諒」呢個「仇人」點解要有上述嘅舉動，但效果奇差，反而令玩家對角色更加反感。

更令人感到虛偽嘅今集Naugty Dog名義上鼓勵無殺傷潛入，但遊戲中卻冇麻醉鎗之類嘅非殺傷手段，畫面甚至比上集更加血腥，變相到最後都係要靠勇武過關，但遊戲最後眼見Ellie大仇得報，劇情竟然強逼大家化身「大愛L」放仇人一馬！Ellie遇神殺神由上集殺到今集，去到最後竟然放咗個殺親之仇？難怪用家評論最常出現嘅批評，就係今集嘅編劇完全催毀上集所建立嘅人設，劇情毫無說服力。

圖片：The Last of Us 2 官網

圖片：The Last of Us 2 官網

另外劇情老土、突兀、新角色唔討好，過度政治正確 (宣揚LGBTQ社群)、缺乏解謎成份、過多使用QTE等亦係網民批評嘅地方。

咁成隻Game有冇嘢係好嘅？有！幾乎每個鬧嘅玩家都會加一句，「畫面真係好靚，畫面細節相當豐富」……係囉，冇啦。