武肺疫情放緩，本港市面漸漸恢復熱鬧，早前被逼關閉嘅娛樂場所，如戲院等亦已經重開，不過要大家入場，始終都需要一部夠吸引力嘅大作。原定7月30日香港上映、Christopher Nolan新作、睇極條預告都唔知佢講咩但又好似好好睇嘅《Tenet 天能》，本來就應該係唔少人疫後第一次入場嘅首選，不過大家似乎就要等多一個月，因為美國方面已經宣佈延期上映。

圖片：Warner Bros HK

《Tenet 天能》原定於7月17日於美國上映，並且即使早幾個月武肺最嚴重時都堅持唔變，本來有望就會成為7月美國各大院線重開後首部上映嘅大製作，但Warner Bros. 於昨日宣佈，因應疫情關係，會延至8月12日上映。

美國部份州份如德州，早前已宣佈容許戲院有限度重開，但紐約及加州兩大票房重地嘅州政府仍未有計劃重開戲院。另一方面，部份州份重開公眾設施後新確診數字回升，無論係為票房定為公眾安全，《Tenet》選擇延期亦係情理之中。據《Variety》引述Warner Bros. 發言人指，只要院線準備好而衛生當局允許，就會安排《Tenet》儘快上映。發言人亦指《Tenet》會有特別上映安排，會於週中開始上映 (美國慣例係星期五上映)，放映期亦會比起以往更長，令觀眾可以分散於不同日子、場次入場觀看。

《Tenet》原定7月30日於香港上映，暫時未知會否跟隨美國方面延期。