英國ATC係其中一間最享負盛名嘅音響企業，佢地迷人而獨特的「饅頭中音」單元， 俘虜全球眾多英國聲的音響玩家，過去對ATC呢間老牌喇叭的其中一個爭議係喇叭相當難推，要發揮盡就必需花心機選擇後級，2020年的今日唔駛操心，ATC推出限量版有源喇叭系統SCM150ASLT，一對15寸低音單元為主的大喇叭配上原廠的後級推動擴音系統P6，完整匹配榨盡「饅頭中音」的魔力，只要你屋企容納得到，呢對SCM150ASLT有源喇叭組合就可以馬上取悅你，其他細節已經唔重要。

作為音響愛好者應該唔駛點介紹ATC，不過如果未認識佢地就要聽聽，ATC係英國音響以至專家錄音界別都有響噹噹威名，由ATC創辦人兼設計師Billy Woodman作傳統家族式的管理，公司號稱永遠唔會賣盤，小型個體戶也唔需要對所謂股東負責，只對聲音同耳朵負責。最難得的係今時今日係英國依然堅持自己生產喇叭單元的英國喇叭廠已經係極小數，ATC依然堅持自創自研自產的單元，英國小廠人手製造，所以產品一直穩座高階音響品牌一席位。

今次推出呢個 SCM150ASLT實際上係巨型喇叭，每隻喇叭高1.4米，重116KG(你無聽錯)，喇叭由三個單元組成， 分別係一個15吋嘅低音單元， 美輪美奐嘅中音饅頭單元，全新設計的75mm的軟球高音單元，再加一個完全外置的擴音機推動喇叭，成為一個有源喇叭系統。 

推動喇叭的係P6擴音，屬於AB類係單聲道設計，每聲道輸出350W，作為 SCM150ASLT專屬擴音機，具有LEMO喇叭輸出連接器以及XLR輸入，以連接前級或信源。

喇叭廂體係一貫ATC式經典設計，有多種高貴顏色的木貼面可以選擇，喇叭有不銹鋼ATC徽章，限量版底座和後輸入面板，後面板相當簡約只得單個LEMO航空級10針連接器。同時，P6係安置係橢圓形的鋁製機箱當中。ATC SCM150ASLT有源喇叭系統的價格為46,000英鎊，享有六年保養，英國方面現已接受預訂，廠方以到訂單後人手製作，最早收到喇叭相信都要等到8月5日之後。如果你有間大屋，放得落呢對超級大喇叭，而你又鐘意英國式聲音同風格，呢對喇叭絕對係買左唔會後悔，唔買反而追悔。