大家有冇試過行行下街，前面條友突然減速甚至煞停，搞到你差啲就撞埋佢到，然後你仲發現佢係因為一路行一路撳電話先行得咁鬼衰呢？係咪會想偉大嘅政府立一條法禁止啲人一路行一路玩電話呢？又真係有咁偉大嘅政府，不過喺日本足立區！

圖片：News.gamme.tw

卻說日本東京足立區於7月中公佈「Smartphone禁止條例」，簡單啲黎講就係禁止行人喺條街上面一路行一路用電話。相關條例係因應近年越來越多因為行人邊行邊玩電話而發生嘅意外，尤其交通意外而設。具體啲黎講，就係於區內道路、車站前廣場以至公園，無論係步行定係踩單車中，都唔可以使用智能電話，禁止行為包括聽電話、使用地圖App、打機、Send訊息、兩邊耳仔都戴耳筒等，但戴單邊耳筒講電話係可以嘅。換言之如果市民喺條街到想用手提電話，就必須搵個地方企定先可以用。

位於足立區嘅北千住站 

圖片：Wikipedia

雖然有人支持相關條例，但亦有人認為條例矯枉過正，尤其唔可以邊行邊講電話一條會引起諸多不便。足立區議會亦會逐漸完善目前頗為籠統嘅條例，並會引入罰則。