大家近排成日聽到電影因為「擔心戲院停業影響票房而選擇將電影延期」，但大家有冇好奇過成個地球咁多個國家N間戲院，究竟有幾多真係仲停緊業？根據英國Gower Street Analytics嘅調查，其實目前全球有一半戲院已經重開。

Gower Street Analytics利用全球各個地區戲院嘅票房歷史，推出目前嘅「可用票房」，再對照Comsocre上嘅全球票房，以計算出每個週末全球有幾多戲院有營業。結果發現過呢個週末，有48%戲院已經重開，比起上週嘅41%提升，比係7月18日嘅28%更係幾乎翻倍。數據提升原因為英國、俄羅斯及中國有大型院線重開有關。

但要留意嘅係，目前戲院即使重開，大多都有隔位隔行坐嘅防疫措施，所以實際上其實係只有四份一戲院位置有開放。而截至上週，本年度全球總票房為64億美金，比起上年同期嘅245億美金大跌74%。