美國三大航空公司美國航空 (American Airlines)、達美航空 (Delta Air Lines) 及聯合航空 (United Airlines) 於一日內先後宣佈永久取消「更改或取消機票」嘅費用，背後嘅原因？肺炎囉。

雖然三間航空公司都只係取消美國本土內陸機嘅相關費用，但背後嘅原因其實都係減低搭飛機嘅成本，令大家更加願意去坐飛機。實際上，早於3月時三大航空公司已經宣佈暫時取消相關手續費，依家明文公告永久取消，就係希望為顧客提供更多彈性、亦減低旅客們計劃行程時嘅麻煩，講到尾就係想大家多啲去坐飛機。當然亦有「對家減我要跟住減」嘅壓力。

你又唔好以為呢啲只係小恩小惠，事關手續費其實係佔航空公司收入一個幾大嘅部份。據《The Verge》報導，2019年聯合航空嘅手續費收入為6.25億美金、達美航空都收緊6.15億美金，成個美國航空業嘅手續費收入達28億美金。依家財大氣粗嘅三大航空公司都取消手續費，對規模較少嘅航空公司就會產生巨大壓力。