Netflix宣佈開拍以中國科幻小說作家劉慈欣成名作《三體》改編嘅真人版英文劇集，並搵黎《Game of Thrones》製作人David Benioff及D.B. Weiss擔任製作人，曾聯手製作《Star Wars: Episode VIII - The Last Jedi》及《Knives Out》等作品嘅Rian Johnson及Ram Bergman亦會參與製作。

圖片：Wikipedia

《三體》為劉慈欣於2006年開始連載嘅長篇科幻小說，單行本總共分為三部，並稱為「地球往事」，其故事擁有非常嚴謹嘅科學性，規模亦極為宏大，由地球出現嘅怪象到外星人入侵到「宇宙政治角力」再到宇宙毀滅，書中亦曾提出「黑暗森林法則 (即於宇宙中唯一保存自己嘅方法係唔好被人發現，一旦被發現就只會被毀滅)」等具啟發性嘅理論。《三體》於中國及國際間亦頗為有名，前美國總統奧巴馬曾公開指自己睇緊《三體》，《三體》英文版亦於2015年獲得號稱「科幻小說最高榮譽」嘅雨果獎。

值得一提嘅係，《三體》原作者劉慈欣及英文版譯者劉宇昆亦會加入劇集製作團隊擔任顧問。暫時未知會有咩演員、亦未知劇集幾時開拍、上映。