為促進多元包容及平等，由由美國電影藝術與科學學院舉行嘅奧斯卡金像獎日前宣佈改例，其中最重要嘅係，由2024年第96屆奧斯卡獎開始，所有報名參加角逐「最佳電影」嘅電影，都必須要符合一系列符合多元包容嘅額外條件。有人讚揚奧斯卡為促進業界平等出一分力，但亦有人認為整件事太政治正確。

新規定分成「幕前呈現、主題及故事」、「創意及企劃團隊」、「行業入行機會」、及「觀眾發展」四大條件，基本上涵蓋電影前期、拍攝、後期、發行等整個產業鍊，而四大條件下又分拆成幾個小條件，要於2024年奧斯卡競逐最佳電影嘅作品，就必須符合其中兩個大條件；而要符合大條件，又必須符合其中一個或多個小條件。

就拎「幕前呈現、主題及故事」呢個大條件黎講，要符合佢就要「至少一名主角或重要配角係少數族群 (如亞裔、拉丁裔、美藉非裔、世界各個少數民族)」，或「30%配角或群角係女性、少數族群、LGBTQ+或身體有認知或身體殘障或聽障人士」，又或者「主要故事、主題、敘事係以女性、少數族群、LGBTQ+或身體有認知或身體殘障或聽障人士為中心」。是但中一樣你就算係附合「幕前呈現、主題及故事」呢個大條件，然後揀多另一個大條件，做埋佢入面嘅小條件，你就可以報名參加「最佳電影」啦。

可以想像，為咗作品能夠爭取最佳影片，電影製作、發行、投資方必定會儘力做到以上條件，亦的確能夠改善目前「以白人男性為主」嘅荷里活慣例。但呢啲條件會唔會反過來限制電影嘅創作空間？到時究竟係鬥套戲好睇，定係鬥政治政確？相信等多幾年大家就知啦。