據《Variety》獨家報導，世嘉正籌備開拍旗下著名遊戲系列《人中之龍》嘅真人版電影——不過好有可能係外國人版！

據報，電影會由1212 Entertainment 及Wild Sheep Content製作，三位製作人分別為Erik Barmack，Roberto Grande及Joshua Long。1212 Entertainment指，「人中之龍提供一個新嘅背景、複雜嘅角色，令我哋可以創作一個觀眾好少見到嘅世界。桐生一馬嘅故事本身就已經非常有電影感，有動作、有搞笑、又一個贖罪嘅故事。」

值得一提——當然大家睇名都估到——以上三位製作人及兩間製作公司都係外國人，換言之呢套《人中之龍》真人電影版，好有可能係以外國為背景、外國人做主角以及主要創作 (相信亦係點解呢個消息會由美國嘅《Variety》傳返黎嘅原因之一)。再加上世嘉上一套真人化嘅電影係《超音鼠》黎講呢…大家做定心理準備啦。