自從發生疫情，全球各國都先後發出禁令禁止戲院等室內場所營業，院線收入大減、片方唔再推新戲、大家都冇戲睇。要打破呢個僵局，最好嘅辦法當然係政府宣佈戲院重開。但喺美國三藩市地區，就算政府早前放寬規管，指當地戲院可以於10月7日重開，戲院組織都拒絕遵從，原因係，當局唔畀佢哋賣爆谷。

作為美國主要電影市場之一嘅三藩市地區，當地政府於上週宣佈該區戲院可以於10月7日重開，但國家電影院協會 (National Association of Theatre Owners)嘅加州、內華達分部 (NATO, CA/NV) 於昨日發出公告，指雖然好多謝政府准佢哋開返，但唔畀賣小食飲品嘅規定，「令經濟上無法重開戲院，亦大幅影響觀眾嘅體驗」，所以決定繼續停業。

大家都知戲院嘅收入有一大部份係來自食物及飲品銷售，單靠票房係絕對不足以支持戲院營運，而當區政府提出嘅重開條件不單止禁止戲院販售食物飲品，更有限坐25%人嘅規定，再加埋燈油火蠟人工之類，開業真係可能會蝕得仲多。NATO又指，同區嘅餐廳都係室內，都係要除口罩食嘢，但佢哋就可以照常營業而戲院唔得，係厚此薄彼。

NATO, CA/NV主席Milton Moritz指，「我們的會員已經盡力符合、甚至超出專家提出的防疫標準，我們希望政府能重新考慮戲院的重開計畫，讓我們能夠再次為三藩市社區服務」。