007系列最新作《No Time To Die》早前就宣佈由今年11月中延到下年4月2日，換言之與最初嘅2019年11月8日相比，起碼延咗足足超過年半先上到，換另外一個角度講，就係後期工作老早就應該做好哂，只係幾時拎出黎播嘅問題。所以《No Time To Die》嘅導演Joji Fukunaga (凱瑞·福永) 亦將會開始自己嘅新工作，就係《Band of Brothers》嘅續篇《Masters Of The Air》。

Joji Fukunaga

圖片：Wikipedia

據《Deadline》報導，曾經執導令Alexandra Daddario一脫成名嘅電視劇《True Dectective》嘅Joji，將會加入Steven Spidlberg及Tom Hanks嘅團隊，成為HBO神劇《Band Of Brothers》續篇，將會於Apple TV+播放嘅《Masters Of The Air》嘅導演之一，Joji嘅公司「Parliament of Owls」亦會成為製作公司之一。另外《Masters Of The Air》據報會於下年3月於倫敦開拍。

而且今次合作並非單次性，事關Apple同時與Parliament of Owls簽署合作協議，換言之Joji早年執導嘅《無境之獸 (Beasts of No Nation)》及《罪惡程式碼 (Sin nombre)》都會成為Apple TV+獨佔內容之一。更有可能嘅係，Parliament of Owls未來嘅作品都會成為Apple TV+獨佔，加入Martin Scorsese嘅Sikelia Productions、Leonardo DiCaprio嘅Appian Way、Idris Elba嘅Green Door Pictures、Ridley Scott嘅Scott Free、以及著名獨立製片A24、Imagine Documentaries等多個工作室嘅行列。