Warner Bros. (華納兄弟) 發出公告，指好有可能係今年最後一部大作嘅《Wonder Woman 1984》，將會改為由聖誕節正日開始，於HBO Max及美國院線同步上映，而未有HBO Max嘅海外地區就會由12月16日起於戲院上映，換言之即係同早前Disney播放《花木蘭》嘅安排差唔多。

圖片：Warner Media on Medium

據《The Verge》報導，《Wonder Woman 1984》會由聖誕節正日起，於美國市場以HBO Max及院線同步上映，其中HBO Max用戶唔需要另外付費 (月費本身係15美元。值得一提係早前Disney將《花木蘭》放上Disney+，用戶係要畀咗月費再額外畀錢先有得睇)，但播放期就只有一個月，一個月後就只會得返戲院有得睇 (如果到時仲有戲院上)。而戲院都落畫後，就會放上Amazon、iTunes等VOD平台，然後好有可能會再次放返去HBO Max播放。

圖片：截圖自Warner Media on Medium

雖然Warner Bros. CEO Jason Kilar於官方Medium上撰文指，呢個決定係平衡疫情、院線、製作團隊及Fans們嘅利益後而作出，但其實院線係明顯地成為犧牲品。因為講就講話會於美國院線上映，但目前美國多個大型院線都因為冇戲上、冇人入場而自行停業，就算有院線開門做生意，觀眾有得揀喺HBO Max睇亦會大幅減低入場意欲，換言之呢個安排係完全唔會帶動院線入場人數，院線亦唯有繼續停業。另一邊廂，安排反而會帶動HBO Max嘅會員人數。

圖片：IMDB

至於未有HBO Max服務嘅海外地區 (包括香港)，就暫定於12月16日作院線上映。如果咁唔好彩到時戲院都停業呢…咁睇黎大家就要「被逼」去尋找「非官方」嘅方法啦。

資料來源：The Verge、Warner Media on Medium