PS5比起PS4當然有好多進步，但我夠膽講PS5得到最多嘅評價，一定唔係啲畫有幾靚、Load得有幾快，而係「部機咁大部嘅？」作為歷年黎最大部嘅遊戲主機，PS5唔單止為大家帶來擺放 (及偷運) 嘅問題，英國最大嘅遊戲銷售商「Game」更加將開賣首日嘅物流問題歸咎於PS5嘅大小之上。

「Game」日前向預訂咗PS5嘅客戶發出嘅電郵，指因為「PS5於英國市場嘅貨量以及產品嘅大小，令英國出現大範圍的物流問題」，然後就話，負責送貨嘅其中一間物流供應商「Yodel」指，因為單量超出上限，所以訂咗PS5嘅玩家或者未能於19號開售當日收到機，而可能要等到星期五。簡單啲黎講，就因為Game將「收唔到機」呢個鑊卸咗畀Yodel。

有趣嘅係，Yodel隨後向BBC發出回應，話「我哋一直穩定地完成Game畀我哋嘅運送訂單，對於Yodel個名被錯誤地用作解釋客人收唔到機感到非常失望」，亦即係話「唔關我事唔好賴我！」另一邊廂，由於英國目前處於封城狀態，玩家們只能上網購買PS5，所以Game、Amazon等多個網站嘅PS5頁面都係長期Load唔到。

資料來源：The Verge