之前同大家報導過，Metacritic玩家評分僅為5.7、一出就被人鬧到爆嘅《The Last of Us Part II》獲得The Game Award 2020嘅10項提名，大家應該都覺得難以接受。但近日《The Last of Us Part II》於標榜係公眾投票嘅英國「The Golden Joystick Award」年度遊戲頒獎禮，竟然都奪得年度遊戲、最佳劇情等大作，真係令我開始懷疑唔通我先係少數？

嗱我Check過架啦，由Gamesradar主辦嘅「Golden Joystick Awards」呢，提名名單就係由多間英國遊戲媒體及記者選出，但最後邊個拎獎，佢哋就話完全係公眾投票嘅結果。換言之，係公眾將《The Last of Us Part II》選為年度遊戲、最佳劇情、最佳視覺設計、最佳音效及Playstation年度遊戲，再加上開發商Naughty Dog奪得年度最佳工作室，20個獎中佢拎咗6個。

特別值得一提嘅係，年度遊戲第二名係被指大量抄襲《薩爾達傳說 曠野之德》、又被指有後門程式嘅中國開發遊戲、再被發現審查「香港」、「台灣」字句嘅《原神》。