早幾個月就為大家介紹過Lego推出嘅Iron Man「真．砌圖」，今次要介紹嘅就係同一系列，但就使用另一部人氣作品《Harry Potter》中，魔法學校霍格華茲嘅四大學院徽章為主題嘅新產品。

呢個「真．砌圖」系列 (個名我改架咋下) 其實就係用啲Lego粒粒，以點陣圖方式砌啲圖案出黎，今次砌嘅呢就係霍格華茲嘅四大學院嘅徽章，每個都展示咗學院代表動物、顏色、以及創辦人嘅遺物，而且每個都附送《Harry Potter》Logo小牌。

同之前嘅Iron Man，如果你買夠四盒，仲可以將啲零件合體，砌出一個大嘅霍格華茲校徽——當然亦即係話如果你一次過Show哂四個學院徽章加個校徽，你就要一次過買8盒。咁120歐元一盒，八盒就即係…你自己計啦。