日本經典遊戲廠SNK上星期被阿拉伯王儲入股收購成最大股東後，水喉充足即時「曼城」式崛起，馬上有大動作公佈新作對戰格鬥遊戲《拳皇 15 》（ KOF XV，THE KING OF FIGHTERS XV），遊戲將盛大開發並預告2021年1月7日公開《KOF XV》官方實機遊戲畫面。咪住《拳皇 14 》都無過去咁成功，點叫人期待緊接故事劇情的《拳皇 15 》呢？咁講啦！過去中國資金為主的SNK而家轉左沙特王儲大股東，成間公司可能有新氣象做出來遊戲或許有驚喜，總之熟悉的草薙京紅丸八神庵仲係度。

話說阿拉伯王儲穆罕默德‧本‧沙爾曼(Mohammed bin Salman)係《拳皇》超級fan對此遊戲情有獨鐘，故旗下成立一間遊戲公司EGDC，以195億日圓收購SNK 33.33％的股權，並將於2021年1月前完成交易，收購後王儲Salman將會取代喆元文化成為最大股東。故此，新作《拳皇 15 》絕對會係重鎚出擊。

等到2021 年 1 月 7 日就可以睇到SNK新作《KOF XV》官方預告及展示實機遊戲畫面，另外，到時仲會公開埋已發售中的遊戲《侍魂 曉》季票 3《月華劍士》合作角色。各位KOF的格鬥迷唔知仲會唔會集結重新投入拳皇熱情。