1月1日Tesla中國製Model Y正式係中國上市而且忽然大幅調低售價，一部減十五萬即內地Model Y車價只需要33.99萬，一開預售即時秒爆贏哂所有國產電動車，連官網都賣到一度「癱瘓」。對其他想致敬Tesla的中國電動車廠而言，Tesla又一次改革電動車生態，以平價SUV秒殺其他電動車廠，有內地網民指出對比選擇Model Y同內地電動車廠SUV係「選蘋果還是華為」一樣的問題，中國消費者已經誠實回應！

Tesla1月1的正式開售為其他中國新能源車廠帶來強大的競爭壓力，Elon Musk識玩，係中國設廠唔怕你抄唔怕你盜版，一出就同你鬥平，然後全部人都識選擇。好多中國車主連夜收到風即時退訂中國車廠的其他車型，據中國汽車業內人士表示，特斯拉的降價對中國及全球新能源汽車發展意義重大。(可能喊住講！)據指出作為全球新能源汽車標桿企業，Tesla降價將進一步提升新能源汽車性價比，使電動車性價比超越燃油車拐點提前，同時其塑造的產業生態將引領新能源汽車產業實現新的發展。反正賣大包就係中國市場的成功不二法門。Tesla降價消息公布後的10小時內，訂單數量就飆升至逾10萬架。

Tesla上海太古匯體驗店工作人員指出：「昨日降價消息發布之後，諮詢相當火爆，好多人甚至連車都無睇就直接預訂。「由於現時預訂非常火爆，暫無法提供出車準確的時間。但應該係第一季度能交車。」該人員表示。中國國內近來有好多新電動車新勢力，不過睇到Tesla的營銷同火熱，相信對中國車廠而言都係重大衝擊！其中一部同期推出的國產的電動SUV蔚來ES6就身受其害，國產Model Y的大幅降價後直接同中國品牌蔚來ES6同一價格級別，中國車主即時可以選擇，有網民形容係選擇華為同選擇蘋果一樣的幸福難題。就係Model Y宣布降價的當日下午，中國蔚來係其官方微博發布左一條意味深長的微博：「忠於讓自己『來電』的選擇，不要問『Why』」。好多人睇成係一語雙關，「Why」意指Model Y。微博配圖仲寫到「是對手，也是隊友。2021，一起加電前行」。值得一提蔚來表示消費者就算選擇買特斯拉，仍可免費獲得蔚來旗下NIO Power 3次一鍵加電服務。

Tesla的中國策略非常成功，就係打價格戰盡快搶占市場佔有率，形成類似蘋果係手機行業的壟斷地位，此後靠賣軟件同無人駕駛等服務賺錢，進而靠整個產品生態賺錢。以目前進度Tesla係中國大勝一場。