《Cyberpunk 2077》風波燒咗咁耐，外界討論隻GAME嘅問題仲多過內容，公司股價一直路水。睇嚟波蘭政府介入（詳情可以睇返上篇文）後工作效率暴增，今日CDPR創辦人之一「Marcin Iwiński」拍片首度公開道歉，並交代後續修復補丁及免費DLC問題。

CDPR今次道歉盛意拳拳，雖然條片無好似GAME入面咁有多國語音，但就附上10幾種語言字幕，確保全球玩家都能夠清楚了解內容。Marcin Iwiński 一開波就認衰仔，表示雖然目前PC版評價尚可，但家機版並未達標，就此代表CDPR全體向大家道歉，並強調大家唔好怪罪開發團隊，錯就錯在董事會成員（佢自己都係董事會一員）拍板咁早發售，將所有責任攬曬上身。

（圖片截至：Youtube）

曾有外界聲音指《Cyberpunk 2077》發售前只畀咗PC版各大遊戲媒體試玩，當大家見到試玩片段無問題而紛紛預購，點知家機版出到嚟就「炒曬車」，形容CDPR存心欺騙家機玩家。Marcin Iwiński 就此解釋，12月初時已經畀左PC版試玩序號各大遊戲媒體，為咗家機玩家可以享受美好遊戲體驗，佢哋全力以赴FIX到最後一分一秒（Deadline Fighter？），加上WFH關係影響進度，所以喺發售前2日先畀到家機版試玩各大遊戲媒體。唔知大家對呢個解釋又接唔接受？

（圖片截至：cyberpunk.net）

最後，Marcin Iwiński 展示未來更新計劃，表示將喺10日推內出下一次更新，其後幾個星期都會陸陸續續提供唔同大小更新，搞掂好遊戲問題後將會推出免費DLC，最後於下半年度為次世代家機玩家提供更新檔。大家想知更多Q&A可以到《Cyberpunk 2077》官網細閱。