據日媒報導，東京奧運組織委員會尋日（3日）舉行臨時評委會，討論到點解委員會唔增加啲女性理事嗰陣。擔任委員會主席嘅前日本首相森喜朗表示，因為女人太多嘢講，如果太多女人加入委員會，會搞到開會花好多時間。更舉例話日本橄欖球協會增加女性理事後，開會時間多咗一陪，認為女人好勝心強，當見到有人舉手發言，就會覺得自己都要講下嘢，最終搞到所有人都發言。如果真係要增加女理事，就必定要限制發言時間，否則會議會開到沒完沒了。

呢番言論傳出後，招致社會各界口誅筆伐，無論傳媒定係社交媒體網民都鬧森喜朗性別歧視，要求佢道歉同辭職，其中喺日本Twitter 「#森喜朗辭職」更成為熱門hashtag。1992年巴塞隆納奧運女子柔道銀牌選手溝口紀子就喺Twiiter反駁，會議時間長短唔關女性數目事，係視乎會議主持人技巧。

----
【溝口紀子さんのコメント】女性理事の「発言の時間をある程度、規制をしていかないとなかなか終わらない」のは、女性理事の問題ではなく、会議進行役の手腕によるものだと思いま...#Yahooニュースのコメント https://t.co/8Hwzh9YqMD

— 溝口紀子OLY　Noriko MIZOGUCHI Ph.D (@mysomizo) February 3, 2021

森喜朗今日向傳媒表示，對自己思慮未周嘅言論感到後悔，返到屋企都被老婆、女、孫女圍插。隨著外界聲音愈演愈烈，佢表示已經有心理準備要辭職，稍後將會開記者會公開道歉。