近日Sony公布最新財報，報告顯示PS5由開賣截止上年年底（即係大約兩個月），共賣出450萬部，條數同2013年PS4開賣首兩個月銷量差唔多，不過都正常嘅，缺貨缺到咁，出面大把人有錢都買唔到（黃牛唔計啦）。除咗PS5咁好數，Sony上季同時賣出140萬部PS4，兩者合計令Sony遊戲部門錄得8,832億日元（約652億港幣）營收，比2019年同期增加40%。

就算帳面營收高，但唔代表實際利潤。由於零件短缺加上「戰略（先虧後賺）」定價，Sony喺財報坦言PS5製造成本比售價更高，賣一部就蝕一部，希望之後可以透過賣GAME同服務賺返。

雖然Sony無講每部蝕幾多，但上年10月分析師Michael Pachter曾表示，PS5製本成本大約$450美元，售價$499美元嘅光碟版PS5應該可以收支平衡，而$399美元嘅數位版PS5就真係蝕住賣。